മണ്ണാർക്കാട്: പരസ്യങ്ങള്‍ പതിച്ച പാറകള്‍, ചുമരുകള്‍ എന്നിവ റീ പെയിന്‍റിംഗ് ചെയ്ത് അട്ടപ്പാടിയുടെ തനത് സംസ്കാരവും ഗോത്രപൈതൃകവും അനാവരണം ചെയ്യുന്ന ചുമർചിത്രങ്ങളും പരിസ്ഥിതി സംബന്ധമായ ആശയങ്ങളും ചിത്രീകരിച്ച്‌ ചുരംറോഡ് മനോഹരമാക്കാൻ തീരുമാനിച്ച്‌ വനംവകുപ്പ്. റോഡിലെ എട്ട് പ്രധാന ചുമരുകള്‍, പാറകള്‍ കണ്ടെത്തി അട്ടപ്പാടിയുടെയും സൈലന്‍റ് വാലി ഉള്‍പ്പെടെയുള്ള പ്രദേശങ്ങളുടെയും ജൈവ പ്രാധാന്യവും സംസ്കാരവും വിളിച്ചോതുന്ന ചുമർ ചിത്രങ്ങളുടെ ചിത്രീകരണമാണ് ആരംഭിച്ചത്.അട്ടപ്പാടി ചുരം റോഡില്‍ യാത്ര ചെയ്യുന്ന യാത്രക്കാർക്ക് അട്ടപ്പാടിയെക്കുറിച്ചും ഈ പ്രദേശത്തിന്‍റെ ജൈവ പ്രാധാന്യത്തെക്കുറിച്ചും സംസ്കാരത്തെക്കുറിച്ചും അവബോധം സൃഷ്ടിക്കുക എന്നതും അമൂല്യമായ ജൈവസമ്ബത്ത് മാലിന്യ മുക്തമാക്കുന്നതിനുള്ള അവബോധം സൃഷ്ടിക്കുക എന്നുള്ളതുമാണ് പദ്ധതിയുടെ ലക്ഷ്യം. വിവിധ ഘട്ടങ്ങളിലായി ഒരു മാസം കൊണ്ട് പദ്ധതി പൂർത്തീകരിക്കാനാണ് ഉദ്ദേശിക്കുന്നത്.മണ്ണാർക്കാട് അർബൻ ഗ്രാമീണ്‍ സൊസൈറ്റിയാണ് പദ്ധതിക്ക് ആവശ്യമായ സാമ്ബത്തിക സഹായം നല്‍കുന്നത്. നേച്ചർ ഗാർഡ്സ് ഇനിഷ്യേറ്റീവ്, കാട്ടുതീ പ്രതിരോധസേന, മണ്ണാർക്കാട് റേഞ്ച് ഓഫീസ് കേന്ദ്രീകരിച്ച്‌ പ്രവർത്തിക്കുന്ന കണ്‍സർവേഷൻ വോളന്‍റിയേഴ്സ് എന്നീ സന്നദ്ധ സംഘടനകളാണ് പദ്ധതിക്കായി പ്രവർത്തിക്കുന്നത്. അട്ടപ്പാടി ബ്ലോക്കിലെ റവന്യു ആസ്പിരേഷൻ ബ്ലോക്ക് പ്രോഗ്രാം ഈ പ്രവൃത്തിയുമായി സഹകരിക്കുന്നുണ്ട്.മണ്ണാർക്കാട് ഡിവിഷൻ ഫോറസ്റ്റ് ഓഫീസർ സി. അബ്ദുള്‍ ലത്തീഫ് ഉദ്ഘാടനം ചെയ്തു. മണ്ണാർക്കാട് റേഞ്ച് ഫോറസ്റ്റ് ഓഫീസർ എൻ. സുബൈർ അധ്യക്ഷത വഹിച്ചു. ഡെപ്യൂട്ടി റേഞ്ച് ഫോറസ്റ്റ് ഓഫീസർ മുഹമ്മദ് അഷറഫ്, ആർട്ടിസ്റ്റ് പ്രമോദ് പള്ളിയില്‍, ഉണ്ണി വരദം, പാലക്കാട് സ്വാമി, മുകുന്ദൻ മന്പാട്, മണ്ണാർക്കാട് ഫോറസ്റ്റ് സ്റ്റേഷൻ ജീവനക്കാർ, കാട്ടുതീ പ്രതിരോധ സേന അംഗങ്ങള്‍ എൻജിഐ പ്രവർത്തകർ എന്നിവർ നേതൃത്വം നല്‍കി.
Post a Comment