മണ്ണാർക്കാട് : മണ്ണാർക്കാട് പോലീസും ജില്ലാ പോലീസ് ലഹരി വിരുദ്ധ സ്ക്വാഡും നടത്തിയ പരിശോധനയിൽ മണ്ണാർക്കാട് മുക്കണ്ണം പാലത്തിന് താഴെ വെച്ച് സ്കോർപിയോ കാറിൽ വില്പനക്കെത്തിച്ച 3.33 ഗ്രാം MDMA യുമായി മണ്ണാർക്കാട് പെരിമ്പടാരി നായാടിക്കുന്ന് സ്വദേശി കല്ലേക്കാടൻ വീട്ടിൽ അബ്ദുൾ സലിം (35),മണ്ണാർക്കാട് പെരിമ്പടാരി നായാടിക്കുന്ന് സ്വദേശി പനച്ചിക്കൽ വീട്ടിൽ അജ്മൽ വയസ്സ് (31) എന്നിവർ പിടിയിലായി. മണ്ണാർക്കാട് പ്രദേശത്തെ മുഖ്യ ലഹരി വില്പനക്കാരാണ് പ്രതികൾ . കഴിഞ്ഞ വർഷം 44 ഗ്രാം MDMA യുമായി ഇരുവരെയും ജില്ലാ ലഹരി വിരുദ്ധ സ്ക്വാഡ് പിടികൂടിയിരുന്നു. മണ്ണാർക്കാട് ടൗണിൽ 'മുഗൾ ടീം ' എന്ന ഹോം ഡെക്കറേഷൻ സ്ഥാപനത്തിൻ്റെ മറവിലായിരുന്നു പ്രതികൾ മുൻപ് ലഹരി വില്പന നടത്തിയിരുന്നത്. ജാമ്യത്തിൽ ഇറങ്ങിയതിന് ശേഷവും പ്രതികൾ മയക്കുമരുന്ന് വില്പന തുടരുകയായിരുന്നു . പ്രതികൾ കുറച്ചു ദിവസങ്ങളായി ജില്ലാ ലഹരി വിരുദ്ധ സ്ക്വാഡിൻ്റെ നിരീക്ഷണത്തിലായിരുന്നു. ബാംഗ്ലൂരിൽ നിന്നാണ് പ്രതികൾ മയക്കുമരുന്ന് എത്തിച്ചത്. മണ്ണാർക്കാട് മേഖലയിൽ വർദ്ധിച്ചു വരുന്ന ലഹരി വില്പനയും ,ഉപയോഗവും തടയുന്നതിന് ജില്ലാ ലഹരി വിരുദ്ധ സ്ക്വാഡ് കർശന നടപടി സ്വീകരിച്ചു വരികയാണ്. ലഹരി കടത്താൻ ഉപയോഗിച്ച സ്കോർപിയോ കാർ പോലീസ് പിടിച്ചെടുത്തു. ലഹരിമരുന്നിൻ്റെ ഉറവിടത്തെക്കുറിച്ചും പ്രതി ഉൾപ്പെട്ട ലഹരി വില്പന ശൃംഖലയെക്കുറിച്ചും പോലീസ് അന്വേഷണം ഊർജ്ജിതമാക്കി. പാലക്കാട് ജില്ലാ പോലീസ് മേധാവി ആർ. ആനന്ദ് IPS ൻ്റെ നിർദ്ദേശപ്രകാരം മണ്ണാർക്കാട് ഡി.വൈ.എസ്.പി. ഷിനോജ്. T.S , പാലക്കാട് നാർക്കോട്ടിക് സെൽ ഡി.വൈ.എസ്.പി അബ്ദുൾ മുനീർ എന്നിവരുടെ നേത്യത്വത്തിൽ സബ്ബ് ഇൻസ്പെക്ടർ സുരേഷ്. ഇ.എ യുടനേതൃത്വത്തിലുള്ള മണ്ണാർക്കാട് പോലീസും സബ്ബ് ഇൻസ്പെക്ടർ എച്ച്. ഹർഷാദ് ൻ്റെ നേതൃത്വത്തിലുള്ള ജില്ലാ പോലീസ് ലഹരി വിരുദ്ധ സ്ക്വാഡും ചേർന്നാണ് പരിശോധന നടത്തി ലഹരിമരുന്നും പ്രതികളേയും പിടികൂടിയത്.
إرسال تعليق